Viongozi wa dini watembelea Songosongo

VIONGOZI wa dini wamemaliza ziara yao ya kutembelea shughuli mbalimbali katika sekta ya gesi na mafuta kwa kutembelea kisiwa cha Songosongo eneo la kwanza kuzalisha gesi asilia. Wakiwa kisiwani humo walikutana na uongozi wa kijiji cha Songosongo ambapo walipata taarifa mbalimbali za namna mradi wa gesi ulivyonufaisha kisiwa hicho ikiwemo pia mipango ya baadaye ya kuendeleza eneo hilo.

Akieleza kuhusu manufaa yaliyopatikana kisiwani humo kutokana na kuwepo uwekezaji wa gesi, mjumbe wa Kamati ya Ustawi wa Jamii Kijijini hapo, Chiku Abdalah alisema mbali ya kupata umeme na maji bure, kijiji kimefaidika na huduma nyingine za jamii, ikiwemo wanafunzi kupata msaada wa elimu pamoja na afya.

“ Tunawashukuru Pan Africa na Songas, wanatujali wanatusaidia elimu ya watoto wanatupatia maji, tunashirikiana nao vizuri,” alisema. Mjumbe wa Kamati ya Mipango, Uchumi na Fedha kijijini hapo, Yussufu Faraki alisema shule ya chekechekea imejengwa kijijini hapo na fursa za ajira kwa vijana zimepatikana.

“Tunakwenda vizuri na Songas na Pan African, wamekarabati shule, wametuwekea watu wa mahusiano, walituletea mkunga, wanalipa ada. Tunakubali changamoto zipo lakini kila mmoja anamhitaji mwenzake,” alisema Faraki.

Akielezea kuhusu ziara hiyo, Naibu Katibu Mkuu Wizara ya Nishati na Madini, Ngosi Mwihava alisema wamefika kijijini hapo kuona shughuli za maendeleo zinazotokana na uwekezaji katika sekta ya gesi asilia na kujenga welewa mpana kuhusu uwekezaji wa gesi na faida zake kwa maendeleo ya eneo la uwekezaji, ikiwemo pia maendeleo ya Taifa kwa ujumla.

Katibu wa Jumuiya ya Kikristo Tanzania (CCT) na Mwenyekiti wa Sekretarieti ya Kongamano la viongozi wa dini, John Mapesa alisema elimu ya Songosongo imejulikana kwa viongozi wa dini na namna wananchi wa eneo hilo wanavyoizungumzia sekta ya gesi na namna walivyonufaika nayo.

“Tumepata elimu ya kufaa, tunapoelekea katika kongamano letu, tutajua namna nzuri ya kuishauri serikali na Wizara katika sekta hizi kwa maendeleo ya faifa,” alisema. Ofisa Uhusiano wa Jamii wa Kampuni ya Songas, Nicodemus Chipakapaka alieleza kuwa, mbali na uchimbaji imejikita katika kutoa huduma za jamii kupitia elimu, afya ambapo shirika hilo limekuwa likigharimia wanafunzi wanaofaulu kuendelea na masomo ya sekondari kijijini hapo.

Mbali na hayo alieleza kuwa, Songas wamefanikiwa kuboresha zahanati ya kijiji, ikiwemo pia kuwezesha uwepo wa wahudumu wa afya wanaohudumia wananchi kijijini hapo.

Akieleza namna shirika la Pan Africa linavyosaidia katika shughuli za maendeleo kijijini hapo, Ofisa Maendeleo ya Jamii wa Shirika hilo, Tura David alieleza kuwa, pamoja na mambo mengine, kwa kuzingatia umuhimu wa elimu na namna utakavyowanufaisha wana Songosongo, Shirika hilo limeanzisha mpango wa kusaidia wanafunzi 10 kila mwaka wanafaulu vizuri zaidi na kuwaendeleza katika shule zilizopo nje ya Songosongo na nje ya Wilaya hiyo.

Alisema shirika limejenga bweni la wasichana kijijini hapo lenye uwezo wa kuchukua wanafunzi 55. Kwa mujibu wa Mtaalamu wa Masuala ya gesi na Msimamizi Mkuu wa Mitambo ya Kusafisha Gesi kutoka Shirika la Maendeleo ya Petroli Tanzania (TPDC), Sultan Pwaga, mitambo mipya inayojengwa ya kuzalisha gesi kisiwani humo inatarajiwa kuzalisha futi za ujazo milioni 140 kwa siku, uzalishaji wa umeme wa zaidi ya megawati 10, ambapo pia kutakuwa na mtambo wa kukandamiza gesi, na mtambo wa kusafisha maji ya wastani wa lita 60,000 kwa siku ambapo wananchi wa Songosongo wanatarajiwa kufaidika na huduma za maji hayo.

Makamu Mkurugenzi Uzalishaji Songas, Elias Mnunduma alisema kwa sasa eneo hilo la Songosongo linazalisha gesi ya futi za ujazo milioni 105 kwa siku.

Asilimia 80 ya gesi inauzwa Tanesco kwa ajili ya kuzalisha umeme na asilimia 20 inapelekwa viwandani

Posted in: